सक्छौ तिमी

ॠषिका खरेल, मादरीहाट, पश्चिम बंगाल 

ॠषिका खरेल, मादरीहाट पश्चिम बंगाल 

मेरा शब्दहरुमा
श्रृङ्गार भर्न सक्छौ तिमी।
उसको चित्रहरुमा 
रंग भर्न सक्छौ तिमी।

तर प्रकृतिमा परिवर्तन ल्याउन
सक्दैनौ तिमी!
मेरा खुशीहरुमा
रमाउन सक्छौ तिमी,
उसको दुखाइहरुमा
सम्वेदनाका हाथले छुन सक्छौ तिमी-
तर कसैको भाग्य बनाउन सक्दैनौ तिमी

व्यवस्थामा सुधार ल्याउछौ तिमी,
सुरक्षाको कवच ओड़ाउँछौ तिमी
तर कसैको भाग्य लेख्न
असक्षम तिमी।

भविष्यद्रष्टा,बन्न सक्दैनौ तिमी।
डुब्नेलाई किनार दिन
सक्छौ तिमी,
हार्नेहरुलाई जीतको लक्ष्य
दिन सक्छौ तिमी;
तर मृत्यूलाई बाँध बाँध्न
सक्दैनौ तिमी,
किन कि भगवान होइनौ तिमी

गुराँस समयमा फुल्ने गर्छ
पैयुँ र आरु फुल्न
भुल्दैन कहिल्यै
फूलहरुमा रंग र सुगन्ध
दिन सक्दैनौ
ऋतु बन्न सक्दैनौ तिमी!

विपनाका हर पलहरुको
स्वीकारोक्ति दिन्छौ तिमी
कसैको सपना किन्न असमर्थ छौ
जीवन जिउने आख्यानहरु
बुझाउँछौ तिमी
भावनाको अभिव्यञ्जना दिन्छौ तिमी
तर पनि नियति बन्न
सक्दैनौ तिमी